Naipasidong iti total lockdown iti Brgy. San Agustin ditoy syudad ti San Fernando epektibo idi kalman, Agosto 5, 2020 gapwanan iti agtultuloy a panagngato iti kaso ti Covid-19 manipud iti nasao a barangay.
Maiyannurot daytoy iti naputar nga Executive Order No. 88-2020 nga impatungpal ti lokal a gobyerno ti San Fernando.
Kaipapanan ti total lockdown nga amin a residente ti nasao a barangay ket kasapolan nga agtalinaed laeng iti babbalay ken suruten dagiti naiyetnag a guidelines ken protocols iti pananglaban ti sakit a COVID 19.
Idi kalman, Agosto 5, dua iti nailista a baro a kaso ti COVID 19 ditoy syudad.
Kinumpirmati City Health Office (CHO), base iti report ti Department of Health-Center for Health Development Region 1, dagiti dua a baro a kaso ket agpada met laeng a naggapo iti Barangay San Agustin (Purok 2A) ga iti agdama ket nakapasidong iti TOTAL LOCKDOWN.
Daytoy ket resulta iti agtultuloy a mass testing iti nadakamat a barangay.
Kabayatanna, iti intero a probinsiya ti La Union, nakailista itan iti pakabuklan a 110 confirmed cases a pakaibilangan iti 47 nga active cases.
Uppat met ti nainayon a baro a kaso.
Malaksid kadagiti dua a bailista ditoy syudad, maysa ti kaso a naggapo idiay ili ti Bauang ken maysa met idiay ili ti Rosario, La Union.
