LA UNION – Posible a maisayangkat ti bilateral meeting iti Pilipinas ken China inton Hulyo, 2024 kalpasan ti naranggas a pananglapped ti China Coast Guard (CCG) iti resupply mission ti Pilipinas idi Hunyo 17.
Segun kenni Foreign Affairs Secretary Enrique Manalo, pattien ti ahensiya a masapul latta nga irupir ken usaren iti dayalogo ken diplomasiya iti laksid ti napasamak.
Nupay kasta, aminado iti opisyal a maysa daytoy a dackel a karit.
Segun iti sekretaryo, mabalin a mairugi ti dayalogo iti umuna a lawas ti Hulyo babaen ti Philippines-China Bilateral Consultation Mechanism tapno pagsaritaan ti kaudian a pasamak.
Mangnamnama ti sekretaryo a makabukel ti nasao a dayalogo ti ‘confidence-building measures’ nga agserbi a basaran iti napaspasnek a saritaan nangruna iti masakbayan.
