Dimmar-ay ti P-pop girl group a BINI ti send-off ken thanksgiving mass kas panagsagana iti masungad a debut-da iti Coachella Valley Music and Arts Festival.
Naangay ti misa idi kalman, Marso 23 iti Chapel of the Annunciation of Our Lord ti maysa a network, a tinabunuan dagiti walo a miembro ti grupo, dagiti pamiliada, ken dagiti opisial ti kompania.
Segun kenni Jhoanna, paset ti trabahoda iti panagsimba sakbay ti tunggal napateg a pasamak kas panagyaman ken panagkiddaw ti panangiwanwan. Kabayatanna, inaklon ni Mikha nga arigna saan pay a nag-sink in iti umadanin a panagperform ti grupo, ngem determinadoda nga ipaay ti amin a kabaelanda.
Sakbayna, nangangay iti grupo ti send-off event kadua dagiti nasurok-kumurang 15,800 fans idiay Taguig, ken inwaragawag ti EP a “Signals,” a mairuar inton Abril 9.
Agpabuya ti BINI inton Abril 10 ken 17 idiay Coachella, ken manamnama a makaaramid iti pakasaritaan kas kaunaan nga homegrown Filipino group nga agpabuya iti nasao a festival.###
