Karaman kadagiti kangrunaan a probisyon ti Senate Committee Report iti nasional a budget ti kanayunan a pondo para iti salun-at, edukasyon ken kadagiti proyekto a pang-imprastraktura, segun kenni Senate Finance Committee Chairperson JV Ejercito.
Nakapauneg iti daytoy ti P52 bilion a kanayunan a pondo para iti sektor ti salun-at, pakairamanan ti P19.8 bilion a panagngato ti badyet ti PhilHealth manipud P74.4 bilion agingga iti P94.2 bilion tapno mapalawa ti health coverage ken benepisio a maitunos iti Universal Health Care.
Adda met kanayunan a pondo a P9.6 billion para iti DOH, pakairamanan ti pondo para kadagiti health facilities, preventive health programs, immunization ken Sulu transition subsidy. Karaman pay kadagiti prioridad ti Zero Balance Billing tapno direkta a makaipaay dagiti ospital iti medical assistance para kadagiti indigent patients, PWDs ken senior citizens.
Kabayatanna, nailatang met ti kanayonan a pondo a P15.3 billion para iti edukasion, pakairamanan ti P11 billion para iti school-based feeding program, nayon a pondo para kadagiti state universities and colleges (SUCs), ken P850 million para iti programa ti SUC Smart Campus.
Iti imprastruktura, P68.797 bilion ti naisubli para iti foreign-assisted projects pakairamanan ti Metro Manila Subway, North-South Commuter Railway, Cavite-Bataan Bridge ken Laguna Lakeshore Highway.











