BR LA UNION – Natay iti Bise Mayor idiay Ibajay, Aklan a ni Julio Estolloso, 50-anyos, kalpasan a maipagarop a pinaltugan ti incumbent municipal councilor, iti uneg mismo ti opisina na pasado alas 9:15 ti agsapa idi kalman, Agosto 8, 2025.
Binigbig met ti Ibajay Municipal Police Station iti suspek a ni Mihrel Senatin, 43-anyos, ken armado ti maysa nga 9mm a paltog.
Naiturong ti biktima iti ospital ngem naideklara a dead on arrival iti oras alas 10:23 am.
Maysa a kitkitaen dagiti otoridad a motibo iti krimen ket iti posible a pannakarurod ti suspek iti biktima, gapu iti kidkiddawen na a kopya kadagiti amin nga ordinansa a naipasa iti sidong ti termino ni Estolloso.
Nagsagaba ti tama ti paltog iti kannigid a barukong ti bise mayor a puon ti nakatayan daytoy.
Kabayatanna, inarestar dagiti otoridad ti suspek iti pagtaenganna, agsipudta nagawid kalpasan ti pammaltog.
Narekobre dagiti otoridad iti lima a basyo ti bala iti nakapasamakan iti krimen.
Kaso a murder ti maisag-sagana kontra iti suspek a nakabalud idiay Ibajay custodial facility.
