LA UNION – Insalbar ni Sudipen Mayor Alexander Boquing manipud kenni patay iti asawa na a ni Vice-mayor Wendy Joy bayat a mapalpaltugan dagitoy, iti napasamak a panagtambang idiay Barangay Cadapli, Bangar, La Union.
Iti interview ti Bombo Radyo kenni S/Supt. Ricardo Layug Jr., director ti La Union Police Provincial Office (LUPPO), kinuna na a base iti istorya dagiti residente nga immarayat iti agassawa ken iti dua pay a kadwa dagitoy, nakita da a naka-arakup iti awanen puot na a mayor iti misis na, iti uneg ti behikulo dagitoy.
Segun kenni Layug, posible a bayat a palpaltugan dagiti suspek iti lugan ti mayor ket inarakup na iti asawa na tapno salakniban daytoy.
Iti agdama, addan iti natalged a kasasaad ni Vice-mayor Wendy a nadaplisan ti bala iti ulo ken ima daytoy.
Agtultuloy iti panagpa-imbag na iti maysa a pribado nga ospital ditoy syudad ti San Fernando, La Union kagiddan iti nairut a panangbantay kenkuana ti pulisya.
Kabayatanna, saan pay a makaited iti konkreto a konklusyon ti special investigation task group seknan iti motibo ti krimen ngem saan da nga ipa-igid ti isyu iti pulitika, negosyo, trabaho ken personal a biag ti mayor, iti isay-sayangkat da nga imbestigasyon.
