LA UNION – Malamlamayanen iti St. William Cathedral ditoy siudad ti San Fernando ti bangkay ni Bishop Rodolfo Beltran sakbay ti pannakaitabonna inton bigat.
Immuna iti daytoy, pasado alas-9:00 itay agsapa a naisangpet iti cathedral ti bangkay ti pimmusay nga obispo babaen ti pannakayallatiwna manipud iti Diocesan Seminary of the Heart of Jesus iti Barangay San Vicente.
Kabayatanna, nagbalin met a naannayas ti prusision itay agsapa gapu iti panangiwanwan dagiti otoridad iti taray ti trapiko.
Alas-4:00 inton malem a maangay ti necrological service.
Inton rabii ket manamnama ti panagdududpudop dagiti adu a deboto Katoliko tapno imatanganda iti maudi a gundaway ti obispo ti probinsia ti La Union.
Mainaig iti daytoy, naminsan pay a nagyaman ti kabsat ni Bishop Beltran a ni Fr. Franklin Beltran gapu iti nabara a pannakipagladingit dagiti kaprobinsia iti nasao nga obispo.
Maipalagip a pimmusay ni Bishop Beltran idi napan a lawas gapu iti sakitna a prostate cancer.
