LA UNION – Binalakadan ni Mr. Miguel Vargas – Board of Director ti Philippine Nurses Association-La Union Chapter ti publiko nangruna dagiti agtutubo seknan dagiti risgo ti vape wenno e-cigarettes iti salun-at iti maysa a tao.
Iti pannaki-uman tio Bombo Radyo La Union ken Vargas, inrakurak na a ti vape ket addaan kadagiti ramen a makadadael iti salun-at.
Maysa ditoy ti nicotine a mabalin a mangitunda ti pannaka-adik iti vape ken ti formaldehyde a maysa a kemikal a kangrunaan a component ti glue ken adhesives.
Daytoy ti rason no apay nga inpaganetget ni Vargas a masapol nga ikkan dagiti maseknan nga ahensya nangruna ti Department of Health ti pokus seknan ti availability ti vape ditoy pagilyan, kasta pay a mapaiggetan ti monitoring dagiti kameng ti pulisya nangruna ket naruay dagiti agtutubo a gumatgatang iti vape.
Kabayatanna, inyunay-unay na a masapol ti naan-nayas a regulasyon seknan ti panaglako ken panaggatang ti vape tapno makaliklik iti aniaman a sakit a mabalin nga itunda ti Vape wenno e-cigarettes.
