LA UNION – Naminsan manen a nagserbi a dalan iti Bombo Radyo La Union tapno maisubli iti maysa a 18-anyos a baro iti napukaw na a pouch a naglaun iti ribu a kantidad ti kuwarta.
Napalalo iti panagyaman ken rinaem ni Jubel Bartolome ti Barangay Lingsat, San Fernando City, La Union iti dua a lallaki a nagturong iti istasyon ti Bombo Radyo gaputa agtalek da a maisubli daytoy iti pudpudno nga akinkukua.
Dinayaw na iti kinapudno dagiti “honest gentlemen” nga isuda Charlie Cariño ken Mark Anthony Flores ti Barangay Dalumpinas Este ditoy syudad.
Segun kadagiti dua, napidot da idiay sementeryo ti nasao a pouch ngem saan da a pinag-interesan iti ribu a kantidad ti kuwarta agsipudta pattien da a kasapolan daytoy ti tao nga akinkukua.
Segun met kenni Bartolome, mapan koma gumatang ti lames iti pagtagilakwan nga asideg iti sementeryo idi mapukaw na ti imet daytoy a pouch.
