Nangrugin a naipatungpal idi kalman, Agosto 11, 2023 ti Border Checkpoint iti ili ti Agoo, La Union.
Daytoy ket kas panagsurot ti pammilin ti Provincial Government of La Union kasaruno ti pannakakumpirmar nga addan ti kaso ti African Swine Fever (ASF) idiay San Benito Sur, Aringay, La Union.
Gapu ti daytoy, naipatungpal ti mandatory ASF Checkpoints kadagiti borders ti ili partikular ti Barangay Macalva , Barangay Sta Rita East ken San Jose Sur babaen iti ASF Task Force.
Kas pammilin ni Agoo Mayor Frank O. Sibuma, masapul a dumsaag ken agbaddek iti foothbaths dagiti amin nga indibidual a nakalugan iti behikulo a sumrek iti Daya, Amianan ken Abagatan a border ti munisipiyo.
Innayon pay ti Mayor nga agtalinaed ti operasyon dagiti border control points ken animal quarantine checkpoints tapno mabantayan ti pannakaibiyahe dagiti sibibiag a baboy, karne ken dagiti pork products.
Al-allokoyen ti mayor dagiti residente ti Agoo a sumurot kadagiti naipaulog nga allagaden tapno maliklikan a makastrek ti ASF iti Agoo, La Union.
Dagiti nasao a Task Force ken buklen dagiti Office of the Municipal Agriculture Office (MAO), Municipal Disaster Risk Reduction and Management Office (MDRRMO) ken Philippine National Police (PNP).
