LA UNION – Maysa iti napakarwan ken maysa met iti nadaplisan iti bala ti paltog iti napasamak a shooting incident itay alas 11:20 ti agsapa idiay Barangay Pantar Sur, Balaoan, La Union.
Dagiti biktima ket aguliteg, da Rommel Paguirigan, 35, addaan asawa, residente ti nasao a lugar ken Peter Ronald Obaldo, 33, baro, residente ti Brgy. Cabua-an, Balaoan, La Union.
Ni Paguirigan iti nagmaneho iti Mitsubishi Fusion bayat a ni Obaldo iti KIA CRDI (PN: NYQ 786).
Dua agingga tallo dagiti makunkuna a suspek a naglugan iti dua a motorsiklo.
Base iti inisyal nga impormasyon ti Bombo Radyo manipud Balaoan Police Station, naggapo dagiti biktima iti farm dagiti Obaldo, a kukua ti ama ni Peter Ron a ni Retired Police General Pedro Obaldo Jr, ken agawid koman dagitoy idi kellaat a paltugan dagiti suspek.
Kalpasan ti insidente, dagus a naglibas dagiti suspek ngem nabati ti maysa a motorsiklo nga agmaris ti nalabbaga kalpasan a matinnag iti narabaw a rangkis.
Ni Paguirigan iti nagsagaba ti nakarkaru a tama ti paltog bayat a ni Obaldo ket daplis laeng iti tengnged.
Natamaan pay ti bala ti paltog iti maysa a nuang isunga nagsagaba daytoy iti maipagarop a tallo a sugat iti bagi na.
Iti kotse a minaneho ni Paguirigan ket nagsagaba ti 10 a tama ti bala iti maipagarop nga M16 bayat a ni Obaldo ket dua laeng.
Base pay iti report, ni Paguirigan ket naiturong ken agtultuloy a maag-agasan iti maysa nga ospital ditoy probinsiya.
Iti agdama, agtultuloy iti imbestigasyon ti Balaoan Police Station tapno amwen iti kinasiasino dagiti suspek ken motibo iti krimen.
Makunkuna a ti retirado nga heneral iti puntirya dagiti suspek.
