La Union – Pimmusay ti maysa a kandidato para iti Barangay ken Sanguniang Kabataan Election 2018 kalpasan nga naatake iti puso gapu iti maipagarop a pangharharas.
Nabigbig ti pimmusay a ni Cristino Puzon, 67, retirado a principal, residente ti Barangay Apatut, Balaoan, La Union ken agkankandidato kas Barangay Chairman.
Base iti nakalap nga impormasyon ti Bombo Radyo La Union, maipagarop nga iharharas iti kampo ti kalaban ti pimmusay dagiti botante no sadino ket binagbagaan daytoy ti biktima.
Kellaat laengen a napukawan ti puot na ti biktima no sadino dagus daytoy nga naiturong iti Balaoan District Hospital ngem pimmusay gapu iti atake iti puso.
Malaksid pay iti maipagarop a panangharharas ti kalaban a kandidato ti pimmuysay a biktima, imbatad dagiti kagrupo na a tinutokan ti paltog ken pinangtaan pay ti biagda ti agdama a Brgy. Chairman.
Iti pannakiuman met kenni Brgy. Chair. Arturo Osoteo, naglibakan na dagiti akusasyon kontra kenkuana. Numan saan na met a naglibakan nga addaan daytoy ti paltog.
Naamuan nga napintas iti relasyon ti dua a kampo iti uneg ti adu nga tawen ngem gapu iti pannakatay ni Puzon ket naaddaanen daytoy ti lamat.
