LA UNION – Sumangsango iti kaso a panaglabsing iti RA 10591 wenno Illegal possession of fire arms & Ammunition ti maysa a Barangay Kagawad idiay probinsya ti Pangasinan.
Binigbig ni P/SUPT. Fidel Hunyo, chief of police iti Bayambang Police Station ti suspek a ni Nelson Pagador.
Immuna ditoy, nangisayangkat iti operasyon ti Department of Ilterior & Local Government (DILG) Police Regional Office 1 ken dadduma pay nga unit ti kapulisan idiay Pangasinan iti bileg ti search warrant nga impaulog ti korte tapno sukimaten iti pagtaengan ni Pagador.
Naala manipud iti suspek ti (1) unit ti calibre 45 nga addaan 11 bala, magazine manipud iti cal. 45, ken 11 nga bala para iti shotgun.
Immunan a kinuna ni Pol. C/SUPT Romulo Sapitula, regional director ti PRO1 kadagiti amin nga hepe ti pulisya iti rehiyon a mangisayangkat ti Oplan Katok dagitoy tapno allukoyen dagiti gun owner nga i-surrender kadakuada dagiti paltogda nga awan iti naan-anay a dokumento.
Iti agdama, agtaltalinaed iti kustodiya ti PRO 1 ti suspek para iti kanayunan nga imbestigasyon.
