Nagpalagip ti Bangko Sentral ng Pilipinas (BSP) kontra iti ilegal a panagaramid, panag-imprenta, panangipaay, wenno panagusar kadagiti banag nga addaan ti ladawan wenno kaar-arni ti legal tender a paper money ti Pilipinas nga awanan ti pammalubos.
Daytoy ket maitunos iti Circular No. 829, Series of 2014, ken dagiti aglabsing ket mabalin a makulong ti lima agingga sangapula a tawen.
Inlawlawag met ti BSP a mabalin latta nga usaren kadagiti transaksion dagiti paper money ken polymer banknotes nga addaan ti folds ken gusot.
Binalakadan met ti BSP iti publiko a saan a plantsaen wenno ikabil iti nakaro nga init wenno nalammiis a lugar iti kuarta tapno maliklikan iti pannakadadael daytoy.
Maiparit met iti panagsurat, panagmarka, nakaro a pananglukot, panangkartib, panangabot, panagstaple, panagdikket, ken dadduma pay a wagas a panangdadael iti kuarta, ken dagiti aglabsing ket mabalin a mamulta ti agingga ₱20,000 wenno maibalud ti agingga lima a tawen iti sidong ti Presidential Decree No. 247 wenno Anti-Mutilation Law.###
