Impaganetget ti Bangko Sentral ng Pilipinas (BSP) a makatulong iti panagkapsut ti piso kontra dolyar kadagiti sugmamano a sektor ti pagilian.
Segun kenni BSP Governor Eli Remolona Jr., iti sinnukat a limmagpas ti ₱60 tunggal dolyar ket makaipaay ti benepisyo iti current account deficit ken mangpapigsa iti sektor ti eksportasyon. Idi Marso 23, nailista ti all-time low a ₱60.30 tunggal dolyar, kasaruno ti kumarkaro a global tension.
Iti agdama, adda iti asideg ti ₱60.23 iti sinnukat a maikonkonektar iti nangato a demand iti dolyar ken panagngato ti presyo ti langis iti world market.
Kenuda nga agserserbi a proteksion iti nakapsut a piso para kadigiti pamilya ti Overseas Filipino Workers (OFWs), gaputi ngumatngato a gatad ti remittances. Malaksid ditoy, agbalbalin a mas kompetitibo dagiti sektor kas iti business process outsourcing ken turismo.
Nupay kasta, aklonen ti BSP nga adda ti negatibo nga epekto daytoy kadagiti gagangay nga umili. Ti panagkapsut ti piso ket mangigubuay ti panagngato ti presyo dagiti maang-angkat a produkto ti langis, taraon, ken kuryente, a mangpakpakaro ti inflation ken mangipabpababa iti purchasing power.
Inlawlawag ni Remolona a makibiang laeng ti BSP iti foreign exchange market no adda ti nakaro a volatility. Impasigurado na met a nakasagan nga umaksion iti bangko sentral no kaspangarigan agbalin a nagulo iti garaw ti piso iti merkado.###
