LA UNION – Makapadpadas ti nangato a temperatura iti probinsya ken posible a ngumato pay iti tiempo ti kalgaw, segun ti Philippine Atmospheric Geophysical and Astronomical Services Administration.
Ado dagiti ar-aramiden a remedio ti kaadduan tapno maksayan iti marikrikna a kinapudot, kas kadagiti nalammiis a mainom.
Segun kenni Christopher Liquiran – Buko Shake and Graham Shake Vendor idiay San Juan, ado dagiti gumatgatang ti tagilako na nga agbalor laeng ti 30 agingga 100 para iti buko shake ken 60 agingga 100 pesos iti graham shake.
Laksid ti nangato a demand dagiti nalammiis a taraon ken mainom ita a panawen, kasta met iti mapaspasaran a krisis, awan ti planona a agipangato ti presio.
Immunan a naglako ti popcorn ni Liquiran idi agtawen isuna ti 14, ngem sinuktanna daytoy idi kimmapsuten ti panaglakona.
Iti agdama, agtawenen daytoy ti 36 ken addaanen ti bukodna a pamilya. Isu a dakkel ti panagyamanna kadagiti customers gapu ta uray saan a napudot ti panawen ket agtaltalinaed a napigsa ti negosyona. (Report by Bombo Alphea)
