LA UNION – Madama a dukduktalen iti pulisya dagiti suspek a maipagarup a nangbugbog iti maysa a bumbero ken baro idiay Barangay Pagdalagan Sur, ili ti Bauang, La Union.
Nabigbig dagiti biktima nga isuna Harvely Loot, 24, kameng ti Aringay Fire Station, residente iti Barangay Pugo; ken John Paul Cabingas, 25, residente iti Barangay Central East ti nasao nga ili.
Base iti imbestigasyon iti Bauang Police, maipagarup nga agur-uray iti paglugananda a jeepney dagiti dua a biktima iti batog ti maysa a resto bar idi nga immasideg dagiti dua a suspek a nakalugan ti motorsiklo kasaruno ti pammugbog.
Saan a nakabales dagiti biktima, ken nagsardeng laeng ti pannangkabkabil dagiti suspek idi nga immanawa dagiti tattao sadiay.
Dagus a naglibas dagiti suspek kalpasan ti insidente, kabayatan a naiturong met idiay ospital dagiti biktima.
