LA UNION – Binilin ni Department of Health Secretary Ted Herbosa iti Bureau of Quarantine a mangisayangkat ti nairut nga screening iti points of entry para kadagiti pasahero nga aggapo iti sabali a pagilian, partikular iti naka-diskubrian iti baro a COVID-19 “FLiRT” variants.
Mainaig ti daytoy, kinumpirma ni Department of Health (DOH) spokesperson Assistant Secretary Albert Domingo, naipasidong amin a Bureau of Quarantine stations ken dadduma pay nga ahensiya iti heightened alert, babaen iti bileg ti Memorandum No. 2024-48.
Nakailanad iti nasao a memorandum a rumbeng nga obserbaran ti publiko iti basic health measures kas ti regular a panagugas ti ima, umno a panaguyek, lumisi iti natao a lugar ken liklikan a maaddaan ti contact kadagiti tao nga addaan ti flu-like symptoms.
Segun iti Department of Health, amin a rehiyon ditoy pagilian ket agtaltalinaed iti low risk para iti COVID-19 laksid ti naobserbaran nga apagapaman a panagngato iti kaso itay nabiit ken namonitor a baro a variants iti sabali a pagilian.
Iti laksid nga adda manen baro a variants, imbaga ni Sec. Herbosa a saan da nga irekomenda iti panangipatungpal ti restriksiyon iti biyahe wenno border control.
Iti KP.2 ken KP.3 wenno “FLiRT” covid-19 variants ket under monitoring ti World Health Organization.
Daytoy ket descendants ti JN.1, maysa a variant of interest a responsable iti panagngato ti impeksiyon ti nasao a virus iti umuna a paset ti 2024.
