LA UNION – Kinumpirma ni Burgos La Union Mayor Delfin Comedis Jr a mangipaay isuna iti ₱100,000.00 a reward para iti siasinuman a makaited ti naan-anay nga impormasyon nu siasino ti gunman ken mastermind iti napasamak a pammaltog idiay Barangay Upper Tumapoc, Burgos, La Union idi Mayo 03, 2024 a nakatayan ni Barangay Kagawad Celso Apilado.
Iti pannaki-uman ti Bombo Radyo La Union kenni Mayor Comedis Jr, inbatad na a nangilatang isuna ti 100k pesos a reward tapno naparpartak iti taray ti imbestigasyon, tapno dagiti witness ket makitinnulong kadagiti otoridad para iti pannakaipaay ti hustiya iti natay a biktima.
Inladawan pay ti mayor a ti pimmusay a kagawad ket nasingpet, naanus ken nagaget a kagawad.
Innayon na pay a ti Burgos La Union ket very peaceful municipality.
Inallokoy na pay iti publiko nga adda ammo na iti napasamak a krimen nga i-report iti Burgos Police Station wenno itawag iti numero a 0998 598 5161.
