LA UNION – Ipatungpal ti Bureau of Internal Revenue (BIR) ti withholding tax requirement para kadagiti online sellers a manglukat iti negosio kadagiti online marketplaces a kas iti Lazada ken Shopee.
Segun kenni BIR Commissioner Romeo D. Lumagui Jr., awanen ti maited nga extension kadagiti online merchants a mangtungpal iti baro a sistema ti panagbuis.
Kinunana a pinawaywayanda ti nasao a addang tapno makasurot dagiti online sellers.
Inlawlawag ni Lumagui a mangrugi inton Hulio 15, 2024, ipatungpal dagiti Electronic Marketplace Operators ti Withholding Tax kadagiti sellers ken merchants.
Nailanad iti Revenue Regulations (RR) No. 16-2023 a kagudua ti gross remittances ti e-marketplace operations ken digital financial services providers kadagiti aglaklako wenno komersiante para kadagiti tagilako wenno serbisio a nabayadan iti platapormada ket maipaulog iti 1% a creditable withholding tax.
