Nakaalerto itan agraman ti Royal Thai Navy kalpasan a sinerrek iti Cambodian naval forces ti kabaybayan a masakopan ti Trat, Thailand.
Nasaripatpatan iti Thai Navy dagiti Cambodian Naval forces iti parbangon ti Sabado, Hulyo 26 ken naaddaan da iti panagraut.
Immuna a nagpaputok dagiti tropa ti Cambodia agarop alas-5:10 AM idiay Chamrak area, probinsya ti Trat ken apartak met a nagresponde dagiti kameng ti Thailand a nakabase idiay Chanthaburi-Trat Border.
Nangiyuswat ti operasyon ti Royal Thai Navy idiay “Trat Phikhat Pharai 1” tapno bugawen ken dadaelen ti diskarte dagiti Cambodian military a nangraut kadagiti tallo a kritikal a lokasyon ti pagilian a Thailand. Alas-5:40 ti bigat idi naan-anayen a napapanaw ti Thai naval forces ti presensiya iti Cambodian military.
Kabayatanna, daitoyen iti maikatlo nga aldaw iti engkwentro ti nagbaetan dagiti tropa ti Thailand ken Cambodia a nagtaud iti nasurok maysa milenyo a pakasaritaan dagiti dua – sipud pay iti panawen ti kolonyalismo.
Mainaig iti daitoy, iti napasamak nga engkwentro ita a tawen ken nangrugi idi Mayo 28, 2025, maysa a soldado ti Cambodia iti natay idiay Emerald Triangle nga agpada a tagtagikuaen dagiti dua a pagilian.
Para ti umuna a paset ti bulan ti Hulyo ket agpada a nangisayangkat dagitoy kadagiti airstrikes, artillery exchanges, ken panagbomba kadagiti ili asideg ti beddeng da.
Gapo iti tensyon ket rinibu a sibilyan iti nabakwit ken adu a pagilian ti nagpanawagan para iti kinakapia.
