Inwaragawag ti Canada ti counter-tariffs a dumanon ti agingga 50% iti dandani C$28 billion a balor dagiti produkto manipud Estados Unidos kas panagibales kadagiti baro a buis nga impabaklay ni US President Donald Trump.
Sigun ken ni Finance Minister François-Philippe Champagne, epektibo ti nasao a buis inton Setiembre 8 kadagiti produkto a kas iti asero, muebles, ken kawes tapno masalaknib dagiti trabahador ken negosio iti pagilianda.
Timmaud iti daytoy a panagsupiat kalpasan a bimmagsak iti negosasion ti panagtagilako iti nagbaetan ti dua a pagilian no sadino nagpinnabasol dagiti agsumbangir a dasig seknan dagiti saan a nakailintegan a kiddaw.
Inaprobaran ti gobierno ti Canada iti pannakailatang ti C$7.5 billion a tulong para kadagiti domestiko nga industria tapno maliklikan ti nasaknap a pannakapukaw ti trabaho bayat nga agtultuloy ti tension iti panagtagilako.
Laksid daytoy, tinakderan ti White House ken ni Trump a saan a nainkalintegan ti Canada kadagiti saritaan, idinto nga inakusaran ni Prime Minister Mark Carney ti Estados Unidos a kayatna a dadaelen dagiti kangrunaan nga industria ti Canada.
Daytoy a sitwasion iti nakaigapuan ti panagamak iti panagngato ti presio dagiti tagilako iti agpada a pagilian ken nangikabil ti peggad iti masakbayan ti United States-Mexico-Canada Agreement (USMCA) free trade agreement.###
