Inwaragawag ni Canadian Prime Minister Mark Carney iti aldaw ti Huebes, (oras ditoy Pilipinas) a plano ti Canada a bigbigenen iti Estado ti Palestine para ti umay a United Nations General Assembly inton Setyembre, 2025, kasaruno metten iti kumarkaro a sitwasyon ti panagbisin idiay Gaza,
Daitoy a desisiyon ket kasaruno iti France ken Britain a paryas a nangipeksa ti intensyon a bigbigen ti Estado ti Palestine nu saan latta nga agsardeng ti panagraut iti Israel.
Segun kenni Carney, ti agtultuloy a kaso ti panagbisin ken perdisyon idiay Gaza ket mangipakpakita ti in-inut a pannakapukaw ti posibilidad ti kaadda iti nawaya nga estado para kadagiti Palestino kasaruno ti panangbabalaw na iti gobierno ti Israel gapo iti kumarkaro a sitwasyon.
Kinunana na pay a ti desisyon ti Canada ket maibasar iti naikeddeng a reporma ti Palestinian Authority, pakairamanan ti eleksyon inton tawen 2026 a napawilan a makipaset ti Hamas.
Kabayatanna, nainget met a kinontra daitoy ti Israel ken Estados Unidos. Segun iti Israeli Foreign Ministry, panangipakita laeng ti addang iti panagsuporta iti terorista a Hamas ken maibilang a panangtantan iti saritaan ti ceasefire.
Sinegundahan met ni US President Donald Trump iti panangkontra iti panagbigbig ken inawagan na a biddut a desisyon daitoy a mangigubuay laeng iti panangpabora kadagiti terorista.
Maibasar met iti datos ti Gaza health ministry, dumanonen ti 154 dagiti natay iti panagbisin ken malnutrisyon a kaadwan ket ubbing. Idi laeng kallabes ket natay ti dos-anyos nga ubing gapo iti kinakurang ti gatas para iti kondisyon na.
Nupay nangipeksa iti Israel iti panggep da nga isardeng paylaeng iti opensiba tapno laeng makastrek dagiti ayuda idiay Gaza, imbatad ti United Nations a ti gatad dagiti taraon a makadandanon ket saan latta nga umdas.
