Nakadanon idiay Vancouver, Canada iti presko a Carabao Mangoes ti Pilipinas kalpasan a naipatulod idi Setiembre 18 iti maysa a metriko a tonelada wenno 250 a karton ti prutas.
Daytoy iti maikadua a commercial shipment ti Carabao mangoes idiay Canada kalpasan iti umuna a shipment idiay Toronto idi Hunyo, ken umuna a shipment met idiay Vancouver.
Ti produkto ket manipud iti Mensch FilAm Corp. ken inawat ti Vancouver-based distributor a Fresh Makers Ltd.
Segun kenni Agriculture Secretary Francisco Tiu Laurel Jr., paset daytoy iti panangpalawa ti overseas markets para kadagiti produkto ti agrikultura ti pagilian ken panagngato ti birok dagiti mannalon.
Kabayatanna, itantandudo met ti Bureau of Plant Industry iti nalawlawa a market access idiay United Kingdom para kadagiti produkto kas ti Cavendish bananas, MD2 pineapples, Carabao mangoes, Solo papaya, ken Hass avocados.
Kasukat daytoy, maitantandudo iti panagserrek ti presko nga apples manipud United Kingdom iti Pilipinas, bayat a nakatuding iti maysa a proposed audit visit inton Oktubre 2026 kas paset ti plant-health ken food-safety requirements.###
