BR LA UNION – Dinayyeg manen ti magnitude 4.6 nga aftershocks iti amianan a kabisera ti Caracas, agsapa ita nga aldaw ti Lunes (oras idiay Venezuela).
Naamwan nga epekto daytoy iti dua a napigsa a gingined itay nabiit a timmama iti nasao a pagilian.
Segun kadagiti otoridad, awan ti nailista a baro a perdisyon manipud iti aftershock.
Agtultuloy ti maisay-sayangkat a nalawa a search and rescue operations kadagiti apektado a lugar, nangruna idiay La Guaira, a maysa kadagiti kangrunaan a tinamaan ti gingined.
Maibasar iti sumagmamano a report, umaboten iti aganay 1,500 a tattao ti natay, bayat nga adu pay ti mapukpukaw ken agtultuloy a sapsapolen dagiti rescuers manipud kadagiti narsuod a pasdek.
Umad-adu met ti agsangpet a tulong manipud sabali a pagilian.
Nasurok 24 a pagilian iti nagpatulod ti rescue team, taraon, ken dadduma pay a supplies a makatulong idiay Venezuela.
Kabayatanna, maysa a 21-anyos a lalaki ti natalged a na-rescue iti sirok dagiti narsuod a pasdek kalpasan ti nasurok 106 nga oras a panagsapol.
Naisayangkat iti ballaygi a rescue operation babaen ti tulong dagiti team manipud Venezuela, Mexico, ken El Salvador.
