LA UNION – Nakaawat iti kanayunan a P20 milyon manipud Office of the President ni Pinoy 2-gold Olympic medalist ken gymnast Carlos Yulo.
Naisayangkat ti pannakaiyawat ti cash incentives idiay Palasyo ti Malacañang sumagmamano nga oras idi simmangpet ditoy pagilian dagiti atleta a Pinoy a nakipaset iti Paris Olympics.
Segun kenni President Ferdinand Marcos Jr. tinukadanna laeng iti incentives a nakailanad iti Republic Act 10699 wenno National Athletes, Coaches, and Trainers Benefits and Incentives Act.
Nakailanad iti nasao a linteg a siasinuman nga atleta a makagun-od ti balitok a medalya iti Olympics ket makaawat ti P10 milyon.
Gaputa dua a gold medal iti napangabakan ni Yulo iti floor exercise ken vault, addaan daytoy ti P20-M a maawat maibasar iti linteg.
Impaayan pay ni President Marcos ni Yulo ti Medal of Merit, iti medal a maipapaay kadagiti indibidwal a nakaaramid ken nakagun-od ti pammadayaw kadagiti international events partikular iti benneg ti literature, sciences, arts, entertainment ken sports a maibilang a national pride.
Maipaayan met ti kanayunan a P2-milyon dagiti bronze medalist a Pinay boxers nga isuda Nesthy Petecio ken Aira Villegas, malaksid laeng iti impaay ni Presidente Marcos a P2-M.
Uray dagiti saan a nakagun-od ti medalya ket inikkan ti Presidente ti incentives nga agbalor ti P1-M bayat a sag-P500,000 dagiti coaches.
Simmangpet ditoy pagilian dagiti atleta idi rabii ti Martes ken naisayangkat idi malem kalman ti hero’s parade.
