Maibunongen kadagiti beneficiaries ti Social Amelioration Program ti gobierno idiay ili ti Sudipen, La Union inton aldaw ti Sabado.
Segun kenni Sudipen Vice Mayor Melvin Macusi naitantan iti nasao nga aldaw ti pannakaibunong kadagiti cash assistance agsipudta kinita da a naimbag dagiti rumbeng nga maipaayan ti daytoy.
Kinuna na pay a narigatanda iti panangpili kadagiti umawat ti cash assistance ngem impanamnama na a naiprayoridad dagiti rumbeng a makaawat.
Innayon na pay a saan nga karaman dagiti 4P’s iti nasao a cash assistance wenno CAP agsipudta adda iti sabali nga ahensya a mangipaay kadakuada.
Ti nasao nga ili ket adda nailista a 5,030 a families nga nailista numan pay 3,100 ti naited nga slot kadakuada ti Department of Social Welfare & Development wenno (DSWD) Regional Office 1.
Aganay P5,500 pesos iti maawat a cash assistance dagiti beneficiaries ti CAP iti nasao nga ili.
