BR LA UNION – Inlawlawag ti Catholic Bishops’ Conference of the Philippines (CBCP) a maisupadi kadagiti agwar-waras nga ispekulasyon, awan iti maibilang a “top contender” iti biang dagiti cardinals a makipaset iti conclave para iti panagpili ti baro a Santo Papa kalpasan a pimmusay ni Pope Francis.
Segun kenni CBCP spokesperson Fr. Jerome Secillano, siasinuman kadagiti 135 cardinal electors ket mabalin nga ibotos, ngem agballaygi ti makagun-od ti 2/3 votes.
Kinuna na nga iti general congregation dagiti cardinal, in-nut a maamwan nu siasino iti maiparbeng nga ibotos, nga awan ti kampanya wenno public frontrunner, a produkto laeng kunana ti media ken opinyon ti publiko.
Tallo a Filipino cardinal ti kabilang kadagiti mabalin nga agbotos, isuda Cardinal Luis Antonio Tagle, Manila Archbishop Jose Cardinal Advincula, ken Caloocan Bishop Pablo Virgilio Cardinal David.
Inlawlawag ni Cardinal David, uray saan a sikat ti maysa a cardinal, mabalin latta a mapili ti Sagrado nga Espiritu kas baro a Santo Papa, kas ti napasamak kenni Pope Francis.
Kalpasan a maitabon ni Pope Francis, umuna a maisayangkat ti “Novemdiales,” wenno siyam nga aldaw a panagladingit sakbay a mangrugi ti secretive conclave idiay Sistine Chapel.
Rumwar ti puraw nga asok iti chapel nu addan nabotosan a baro a Santo Papa, idinto a nangisit nga asok nu awan pay iti napili a Sto Papa.
Pimmusay ni Pope Francis idi Abril 21 gaputi stroke.
