Nakatuding a maipresentar inton Setyembre 18 iti kopya ti CCTV footage a maipagarop a nakaala iti maysa a personnel ti construction firm a karaman iti kontrobersiya kadagiti flood control project bayat iti isasarungkar daytoy idiay Senado idi Agosto 19.
Mainaig daytoy iti alegasyon ni sigud a Bulacan assistant district engineer Brice Hernandez a maysa nga agnagan ti Mina, staff ti WJ Construction Company, iti nangipatulod ti “obligasyon” iti maysa nga staff ti senador.
Segun kenni Lacson, panggep ti panangiruar ti CCTB a maamuan no aniya nga opisina ti Senado iti napanan ni Mina. Iti agdama, nalawag laeng a nagturong daytoy iti opisina ti Blue Ribbon Committee.
Mapaayaban met iti nadakamat a personnel tapno maamuan no sino iti binisita na idiay Senado ken no aniya iti makagapo ti panagsarungkar na.
Iti napalabas a panagdingeg ti komite iti Kamara, imbutaktak ni Hernandez a maipagarop a nangiyawat iti WJ Construction ti “obligasyon” kenni Beng Ramos, a nabigbig a kadua ni Senador Jinggoy Estrada.
Nainget met a pinaglibakan ni Estrada nga adda ti tao na nga agnagan ti Beng Ramos ken awan ti ammo na maipanggep iti aniaman a korapsyon kadagiti flood control projects.
Kabayatanna, kenuna ni Lacson a paayaban da met iti opisyal a mangmanmanehar iti CCTV idiay Senado tapno agbalin a pormal iti testimonya seknan iti ala ti kamera.###
