LA UNION – Nagpalagip iti City Disaster Risk Reduction and Management Office (CDRRMO) kadagiti umili a masapul a mangipatungpal kadagiti pagannurotan tapno maliklikan dagiti aksidente bayat ti panagbiyahe wenno panagbakasion iti Semana Santa.
Segun iti CDRRMO, masapul a siguradoen nga umuna iti kondision ti lugan sakbay a bumiyahe babaen iti panang-check iti BLOWBAGETS (battery, lights, oil, water, brake, air, gas, engine, tire, ken self), tapno masigurado a natalged ken mausar a nasayaat iti lugan iti panagdaliasat.
Iti met pakaseknan ti nabara a panawen, pinalagipan ti opisina dagiti umili a mangala ken uminon ti umdas a danum tapno maliklikan iti dehydration bayat ti panagbiyahe wenno panagbakasion.
Mangipaskil pay ti CDRRMO dagiti palagip kadagiti designated areas tapno mangted iti pammagbaga ken giya kadagiti tattao bayat iti panagrambak ti Semana Santa.
No adda met ti emerhensiya, dagus a tumawag iti Emergency Command and Control Center ti CDRRMO iti hotline a 0917-676-7673 wenno idial ti 911 tapno makaalada iti napardas a tulong.
Iti mensahe ti CDRRMO kadagiti umili ket liklikan iti agtultuloy a panagbabad iti init, patalgeden a nalaing ti bagi babaen ti panag-inum ti danum, kitaen a nalaing dagiti lugan sakbay a rumuar iti balay, ken no saan met a napateg iti lakad ket nasaysayaat nga agtalinaed laengen iti uneg ti balay tapno masigurado iti natalged ken naurnos a panagrambak ti Semana Santa. (Report by Bombo Jordan)
