LA UNION – Nakasagana ti City Disaster Risk Reduction and Management Office (CDRRMO) para iti manamnama a panagdupodop dagiti lokal ken gangannaet a turista iti “Summer Vacation” (SUMVAC).
Nakikoordinar iti opisina kadagiti nadumaduma nga ahensia ti gobyerno kas iti Philippine National Police (PNP), Bureau of Fire Protection (BFP), City Health Office (CHO), volunteer groups, ken Philippine Coast Guard (PCG), kasta met dagiti involved a barangay, tapno talantanen dagiti epektibo nga estratehia ken seguridad a mangsalaknib iti publiko.
Panggep ti meeting a masigurado ti naurnos a pannakaipakat dagiti personnel ken napartak a panagresponde iti aniaman nga emerhensia, nangruna kadagiti lugar a pagdupodopan ti tao kas kadagiti resort, parke, ken simbaan.
Segun kenni Andrew Fil A. Gonzales, Local Disaster Risk Management officer III ti CDRRMO, mangikabilda ti “First Aid Stations” ken “Help Desks” kadagiti estratehiko a lugar, ken maipatungpal ti nainget a panagbantay kadagiti aplaya ken paglangoyan tapno malapdan dagiti insidente ti pannakalmes.
Impalagip met dagiti otoridad iti publiko a masapul nga agbalin a responsable iti panagbakasion, bantayan dagiti annak, suroten dagiti safety protocols, ken uminum iti umdas a danum tapno maliklikan ti heat stroke.
Kabayatanna, agtalinaed ti “blue alert status” ti CDRRMO aginggans malpas ti SUMVAC tapno masigurado ti natalna, naragsak, ken natalged a selebrasion.###
