Inaprobaran ti Commission on Higher Education (CHED) iti polisiya a mangipalubos kadagiti amin nga higher education institutions (HEIs) a mangisayangkat ti naan-anay nga online classes, iti tengnga ti krisis iti langis ken enerhiya a pinataud ti agtultuloy a tension idiay Middle East.
Daytoy nga addang ket temporario kas maysa a sungbat babaen ti “Academic Sustainability Plan” a nangpartuat kadagiti flexible learning rules nga immunan a nausar kabayatan ti COVID-19 pandemic.
Maitunos met daytoy iti direktiba ti gobierno nga i-adaptar dagiti wagas tapno makatipid ti enerhia.
Inlawlaw ni CHED Chairperson Shirley Agrupis nga uray mapalubusan dagiti pagadalan a mangipatungpal ti 100% online class, saan nga automatiko a maikonsidera kas accredited providers ti pormal nga online distance education iti sidong ti agdama nga Online Distance Education Learning (ODEL) framework.
Ti baro nga advisory ket addaan panggep a matulungan dagiti estudyante, mannursuro, ken dagiti institusyon a makalung-aw iti agtultuloy a situasion iti langis ken enerhiya, kangrunaan iti panagcommute ken bayad iti kuryente.
Inlawlawag pay ni Agrupis a mangipatungpal dagiti pagadalan ti naan-anay nga online setup no addaanda ti umdas nga imprastraktura iti information technology ken no nakasagana dagiti faculty members nga epektibo a maisuro dagiti kurso iti digital environment.###
