LA UNION – Kagiddan iti maudi nga aldaw a pannakaisayangkat ti Measles-Rubella Oral Polio Vaccine Supplemental Immunization Activity ti Department of Health, nagpalagip iti Regional Management Committee ti DOH Region 1 iti amin nga LGU iti intero a rehiyon, a kitaen a nasayaat nu adda dagiti ubbing iti masakopan a saan pay a nabakunaan.
Impaganetget ti komite a masapol a maipaayan dagiti ubbing, nga agtawen ti lima agpababa, iti nasao a bakuna tapno mailisi dagitoy iti sakit a kamuras, rubella, ken polio kasta metten a magun-od ti target a porsiento dagiti mabakunaan nga ubbing.
Maipalagip a nasken a magun-od iti tunggal LGU iti 95 porsiento manipud iti pakabuklan a bilang dagiti ubbing a nasken a maipaayan ti Measles-Rubella Oral Polio Vaccine.
Immunan a naipadamag nga iti Provincial Health Office – La Union ket nangisayangkaten ti mop-up operation tapno madetermina dagiti lugar a saan pay a nakaisayangkat ti nasao nga immunization.
Nangrugi ti Chikiting Ligtas Vaccination Program ti DOH idi Oct. 26 ken agleppas ita nga aldaw, November 25, 2020.
