Pinabasol iti China Coast Guard ken Chinese Embassy ditoy Pilipinas ti Philippine vessel iti napasamak a panagdinnungpar idiay West Philippine Sea idi Setyembre 18.
Segun iti Chinese Embassy, nangisayangkat iti “unprofessional maneuver” ti Philippine vessel No. 3015 ken inranta a dumalyasat iti direksyon ti Chinese Coast Guard vessel Sanzhou’ao.
Ipapilit pay iti CCG a mano a daras da a nagpakdaar iti Philippine vessel sakbay a nagsukat iti direksyon ken kellaat a pimmartak.
Kinuna iti Beijing nga adda iti Pilipinas ti sibubukel a pagsungbatan ken nagbasol iti insidente ken inallukoy iti Manila a sardenganen dagiti “provocative acts.”
Maisupadi met daitoy iti waragawag manipud Philippine Coast Guard a nagkuna a dinungpar ti Chinese vessel iti BFAR vessel BRP Datu Magat Salamat kabayatan iti maritime patrol ken fuel subsidy mission kadagiti mangngalap a Pilipino, 54 nautical miles manipud probinsya ti Palawan.
Innayon da pay a nangisayangkat iti napeggad a panagmaniobra ti Chinese vessel sakbay iti panagdinnungpar, rason iti perdisyon ti railings ken deck structures iti BFAR vessel.
