Pinaglibakan ti Ministry of Foreign Affairs ti China nga adda ti pakainaigan ti gobierno da iti AI-generated video nga inruar ti state-run media outlet a mangiladladawan kadagiti Pilipino kas bakes bayat a konkontraen ti 2016 Arbitral Award idiay West Philippine Sea (WPS).
Segun kenni Chinese Foreign Ministry spokesperson Lin Jian, awan ti komento na iti nasao a video ken inlawlawag a saan nga ar-aramiden daytoy ti China.
Nupay kasta, inpaganetget na manen iti nabayag a takder ti Beijing a saan daytoy a bigbigbigen ti 2016 South China Sea arbitral ruling, a segun kenkuana ket ilegal ken awanan bileg.
Kabayatanna, inpaganetget ti Pilipinas iti bileg ti nasao a desision, a mangibagbaga nga awan ti legal a basaran iti nalawa a panangtagikua ti China iti pagin-innagawan a kabaybayan.
Immunan a kiniddaw ti Department of Foreign Affairs (DFA) iti state-run media outlet nga ikkatan ti AI-generated video iti social media.###
