Inpaganetget ni Chinese Ambassador Jing Quan nga awan ti ammo iti gobierno ti China iti kontrobersial nga AI-generated video ti state-run media a nangiladawan kadagiti Pilipino kas dagiti bakes.
Kenunana, saan kano a kontrolado ti gobierno ti China dagiti amin nga ipabpablaak dagiti media iti pagilian.
Nagpanawagan met ti Chinese Ambassador nga ituloy ti Pilipinas ken China iti dayalogo ken negosasion tapno mapasayaat iti relasion dagiti dua a pagilian iti laksid ti agtultuloy a tension idiay West Philippine Sea.
Innayon na pay nga adda met iti susik ti China kadagiti dadduma pay a kabangibang a pagilian, ngem agtaltalinaed a napateg ti diplomasia iti panangsolbar dagiti parikut.
Insingasing met ni Jing nga ipaigid pay laeng dagiti saan a pagkinkinnaawatan ken ipamaysa ti atension iti posible a kooperasion iti oil ken gas exploration.
Kagiddan ditoy, pinasingkedan ti Chinese Ambassador a maaddaan ti bilateral meeting da Chinese Foreign Minister Wang Yi ken Foreign Affairs Secretary Ma. Theresa Lazaro iti sidelines ti ASEAN Foreign Ministers’ Meeting tapno talantanen iti relasion ken dagiti isyu iti nagbaetan ti Pilipinas ken China.###
