Saanen a nakakigtutan ti National Maritime Council (NMC) iti addang ti China a mangipatulod kadagiti kanayunan a barko idiay Ayungin Shoal tapno matakkaban ti nakababain a panagdinnungpar ti Chinese Naval Vessel ken Chinese Coastguard vessel da idi Agosto 11 gapo iti epektibo a panagmaniobra ti BRP Suluan.
Maipalagip a nagdinnungpar dagiti dua a barko ti China kabayatan a kamkamaten da tapno lappedan ti BRP Suluan a maiyuswat ti resupply mission idiay Panatag Shoal.
Segun kenni National Maritime Council Spokesperson Undersecretary Alexander Lopez a manipud idi napasamak iti dinnungpar ket pulos a saan a nangiruar ti ladawan ken videos ti China idinto a mapagsasaritaanen iti international media ti pannakaibabain da.
Patta-patta ni Lopez a ti panangnayon ti China kadagiti maritime assets da idiay Ayungin Shoal ken Bajo de Masinloc ket wagas tapno maipakita kadagiti umili da a nga isuda latta iti addaan ti sibubukel a kontrol iti lugar.
