LA UNION – Laksid iti kaadda pay laeng ti pandemya iti COVID-19, linagip dagiti chinese idiay Hong Kong iti maysa kadagiti public holiday dagitoy a maaw-awagan iti Ching-Ming festival.
Segun kenni Bombo International New Correspondent (BINC) Emily Miranda, daytoy ket kaibatugan ti All Soul’s Day ditoy pagilian a Pilipinas.
Nu ditoy Pilipinas ket malagip ti Piyesta dagiti Natay tunggal Nobyembre uno ken dos, idiay met Hong Kong ket tinawen a marambakan ti Ching-Ming festival tunggal Abril 5.
Kas met laeng kadagiti Pilipino, iti Ching-Ming festival ket napateg para kadagiti chinese idiay Hong Kong, kangrunaanna idiay China, agsipudta iti nasao nga aldaw ket panangipaay ti respeto ken pananglagip kadagiti pimmusayen nga ancestors.
Tampok iti nasao a festival iti tomb-sweeping wenno panangdalus iti panteon dagiti minatay, panangisagut ti mak-makan ken sabong iti panteon dagiti minatay, ken kangrunaanna, panangikararag ti kararua dagiti pimmusayen a cacabagyan.
Segun kenni Miranda, maysa daytoy a gundaway a panagtitipon dagiti agcacabagyan.
