CITY OF SAN FERNANDO, LA UNION – Inyusuat ti City Government ti San Fernando, babaen ti City Social Welfare and Development Office (CSWDO), ti community pantry tapno maited ti libre a produkto kadagiti umili karaman kadagiti kaaduan a naapektaran a sektor ti komunidad ita nga aldaw, Abril 15, 2026.
Naisayangkat ti nasao nga inisiatiba iti “Kubo” a masarakan iti sirok ti Acacia Tree, abay ti City Hall, itay alas-otso ti bigat. Daytoy ket babaen ti pannakitinnulong ti City Federation of Senior Citizens Association Incorporated (CFSCAI), Office for Senior Citizens Affairs (OSCA), ken City of San Fernando Day Care Workers Association.
Segun ti CSWDO, dagiti naiwaras a suplay iti nadakamat nga aldaw ket naggapu iti donasion dagiti opisyales ti Senior Citizens Federation, kas paset ti aktibo a panagkaykaysada iti panangtulong iti komunidad. Dagiti naiwaras a suplay iti napalabas nga aldaw ket manipud iti kontribusion dagiti staff ti CSWDO, nga agtultuloy met a makikadua iti senior citizen sector iti daytoy a trabaho.
Karaman kadagiti maiwaras a produkto ket dagiti kangrunaan a kasapulan kas iti bagas, de lata a taraon, instant noodles, ken dadduma pay a nasken a tagilako a makatulong iti inaldaw a panagbiag dagiti benepisiario.
Impaganetget ti lokal a gobierno a prioridad ti panangipaay iti tulong kadagiti vulnerable groups, pakairamanan dagiti senior citizens, solo parents, persons with disabilities (PWDs), ken pamilia a nakaro a naapektaran iti agdama a krisis.
Agtalinaed a silulukat ti community pantry basta adda umdas a suplay a maiwaras kadagiti agkasapulan. Maiparparegta met ti publiko a makikadua iti daytoy a kita ti gannuat babaen ti panagdonar wenno panagboluntario.
Impanawagan ti gobierno ti siudad ti agtultuloy a panagkaykaysa ken panagtitinnulong ti tunggal umili tapno kolektibo a maparmek dagiti karit a sangsanguen ti siudad, a maitunos iti panggep a panangitandudo iti #PeoplesCity ti #SanFernandoTayo. (Report by Bombo Ericka)
