LA UNION – Mangisay-sayangkat ti City Veterinary Office iti libre a mass anti-rabies vaccination kadagiti aso ken pusa ditoy syudad ti San Fernando.
Segun kenni Dr. Flosie Decena, City Veterinarian, iti isay-sayangkat da nga anti-rabies vaccination kadagiti taraken nga aso ken pusa ket panangsuporta iti World Rabies Day ita a bulan ti Setiembre ken iti target da a zero-rabies case.
Malaksid iti panangbakuna kadagiti nasao a dingwen, mangipapaay pay ti nasao nga opisina iti Information Education Campaign (IEC) mainaig iti animal welfare act ken anti-rabies act, deworming, ken vitamin supplementation.
Nangrugi ti nasao nga aktibidad idi pay idi Sept. 17 idiay Barangay Madayegdeg ken Sept. 18 idiay Barangay Lingsat.
Adda iti nasurok 200 nga aso ken pusa iti naipaayan ti libre a bakuna, iti umuna a dua nga aldaw.
Sumaruno a turongen iti bunggoy ti City Vet. iti Barangay Carlatan inton Sept. 22; Catbangen inton Sept. 24; Cabaroan inton Sept. 25; Pagdalagan Norte inton Sept. 28; ken Barangay Langcuas Sept. 29.
Mangrugi ti aktibidad iti oras ti alas 8:00 ti bigat agingga alas 12:00 iti aldaw.
