LA UNION – Madama iti panagisayangkat ti Provincial Veterinary Office ken Department of Agriculture (DA) Regional Office-1 iti cleaning and disinfection kadagiti pigpens iti naduma-duma nga ili iti probinsiya ti La Union kas panagsagana iti implementasyon ti ‘Babay ASF’ program.
Daytoy ti umuna a proseso iti nasao a programa sakbay ti repopulation kadagiti taraken a baboy kasaruno iti pannakaisayangkat iti bio-assay test.
Ti nadakamat nga addang ket tapno masigurado nga awanen ti pangta iti African Swine Fever (ASF) para iti natalged a panagtaraken kadagiti baboy.
Kangrunaan a pakaisayangkatan daytoy a ganwat ket kadagiti 14 nga ili a naapektaran iti ASF.
Iti pannakiuman ti Bombo Radyo La Union kenni Provincial Veterinarian Dr. Nida Gapuz, kinunana a nangrugin ti panagisayangkatda iti cleaning and disinfection kas paset iti biosecurity protocols idi napalabas a lawas kadagiti ili iti Balaoan, Bacnotan, Sudipen, Aringay ken Pugo.
15 laeng a pigpens ken hograisers iti tunggal ili ti nakaisayangkatan iti cleaning ken disinfection.
Agtultuloy met ti disinfection ken cleaning idiay ili ti Luna, Santol, Bangar, Agoo, Sto. Tomas, Bauang, Naguilian ken iti syudad ti San Fernando.
