Binigbig ti Korte Suprema a mabalin ti kaadda ti co-ownership kadagiti sanikua ti adda iti same-sex relationship nu laketdi isuda ket agnanaed ti maysa a pagtaengan ken adda iti pammaneknek iti aktwal a kontribusyon, kas maiyannurot iti Article 148 ti Family Code.
Segun iti desisyon nga insurat ni Associate Justice Jhosep Y. Lopez ti Supreme Court Second Division, pinagbigyan na ti reklamo a naipila a kimmmiddaw ti panaggudwa kadagiti naipundar a sanikua ti maysa a karelasyon.
Tarigagay na pay a mabigbig kas ‘co-owner’ iti balay ken lote a nagatang idi agdindinna da pay idiay Quezon City ti same-sex partner na.
Idi agangay a nagsina dan, nupay napagtulagan a mailako ken paggudwaan ti bayad kadagiti sanikua, immatrasen ti maysa ken pinagtalikudan a ‘co-owner’ ti partner na.
Binaliktad ti Korte ti desisyon ti Regional Trial Court daitoy ken pinaboran ti sigud a karelasyon a kimmiddaw ti bingay na ti nalakoan iti balay ken daga idi agdindinna da pay.
Ditoy ket impaganetget ti Korte Suprema ti probisyon ti Family Code a nakailanad ti ‘property relations’ ti saan a kasar ngem agkadwa met wenno agnanaed ti maymaysa a balay.
