Immapela ni sigud a Department of Justice Secretary Atty. Vitaliano Aguirre II iti Korte Suprema tapno kitaen wenno repasuen iti proseso ti panangbigbig iti ‘extradition’ manipud iti ganggannaet a korte, partikular ti International Criminal Court (ICC).
Kenunana a nabiit pay a nangipaulog ti Supreme Court dagiti pagannurotan maipapan iti panagdengngeg kadagiti kiddaw tapno ipatulod ti maysa nga indibidual iti sabali a pagilian.
Mamati isuna a masurot iti implementasyon ti ‘Rules on Extradition Proceedings’ nga inruar ti Korte Suprema.
Nakalanad ditoy a sakbay a ma-extradite ti akusado wenno indibidual nga addaan ti ‘warrant of arrest’ iti ‘requesting state’ ket kasapulan a lumasat pay nga umuna iti ‘judicial process’ wenno iti korte ti pagilian.
Dayta iti gapuna a kiniddaw ni sigud a Justice Secretary Vitaliano Aguirre II iti Korte Suprema a lawlawagan daytoy kangrunaan ti maipanggep iti kaso wenno isyu ti International Criminal Court.
Inpetteng na a daytoy iti wagas tapno ad-adda a maawatan dagiti akusado no ania ti karbenganda kas Pilipino a kayatda a ma-extradite iti sabali a pagilian.
Ni Atty. Vitaliano Aguirre II ket nagserbi a sigud a sekretario ti Department of Justice iti napalabas nga administrasion.
Maysa isuna kadagiti walo nga innaganan ti International Criminal Court a kas co-perpetrators ti sigud a presidente iti kaso a ‘crimes against humanity’.
Malaksid kenkuana, karaman ditoy da Senador Bong Go, Senador Bato Dela Rosa, sigud a National Capital Region Police Chief Oscar Albayalde ken dadduma pay.
Nainget met a pinaglibakan ni Aguirre a karaman isuna iti pannakaipatungpal ti ‘war on drugs’.###
