BR LA UNION – Inwaragawag ni Mamamayang Liberal party-list Representative Leila De Lima a bimmassit ti lubong dagiti co-perpetrator ni sigud a President Rodrigo Duterte kalpasan a naganan ti International Criminal Court (ICC).
Kabilang ditoy da Senator Ronald “Bato” Dela Rosa, Senator Bong Go, sigud a Justice Secretary Vitaliano Aguirre II, ken sumagmamano nga opisyal ti Philippine National Police (PNP).
Iti maysa a video statement nga inruar ti mammanday linteg idi kalman, Sabado, Pebrero 14, idi pay nakabalud isuna ket binallaaganna dagitoy, a dumteng dayta nga aldaw.
Kinuna na a kas ti sigud a Presidente, saan da nga impangag ngem ketdi dagitoy pay ti nalastog.
Nagballaag pay ni De Lima nga adu kadagitoy ti aglemmeng iti linteg ken sumurot kenni Senator Bato.
Nupay kasta, anyaman ti mapasamak, kamaten isuda ti hustisiya ken agpannuray ti linteg.
Immuna ti daytoy, maibasar iti inruar a dokumento ti International Criminal Court, ti pannakairaman da dela Rosa ken Go iti listaan ket gapu iti nagbalin a papel da iti panangipatungpal ken panangsuporta kadagiti polisiya ti drug war ni sigud a presidente Duterte.
Maipalagip a ni dela Rosa ti hepe idi ti Philippine National Police a nangidaulo ti kampaniya kontra iligal a droga, bayat a ni Go ti nagserbi idi nga Special Assistant to the President (SAP).
