Impaganetget ti 1SAMBAYAN Coalition a saan nga imposible nga ibabawi wenno sabalyan ti Korte Suprema iti inruar da a desisyon maipanggep iti impeachment.
Mamati iti nasao a Koalisyon a daytoy ket mabalin pay a mapasamak uray pay iti resulta ti binotos dagiti mahistrado ket ‘unanimous decision’.
Segun kenni Atty. Howard Calleja, Co-convenor ti 1SAMBAYAN Coalition, ado a desisyon iti binaliktad ti Korte Suprema iti napalabas.
Daytoy ket iti laksid ti 13-0-2 a resulta dagiti botos wenno 13 a mahistrado iti bimotos a pabor iti deklarasyn, maysa a nagabstain, bayat nga iti maysa ket naka-‘leave’.
Kenuna ni Calleja, agkidkiddaaw isuda iti Korte Suprema nga ikkan ti atensyon iti impila da a ‘motion for reconsideration’ ken mairekonsiderar iti deklarasyon nga ‘unconstitutional’ iti ‘articles of impeachment’ ti Kamara.
Agtalek daytoy a saan a maibilang kas ‘moot and academic’ iti mosyon uray pay anya iti desisyon ti senado.
Maipalagip nga indeklara ti Supreme Court iti ‘articles of impeachment’ kas ‘unconstitutional’ gaputa saan a nasurot ti Kamara iti ‘1 year ban rule’ ken ti ‘due process’.
Impaganetget ti Korte Suprema a daytoy ket dagus a maipatungpal maibasar iti nailanad iti desisyon nga ‘immediately executory’.#
