LA UNION – Nalpasen a nai-deliver ti Coast Guard Northwestern Luzon (CGNWLZN) iti second batch dagiti naurnong da a family food packs para kadagiti biktima ti panaglayos idiay Cagayan ken Isabela.
Daytoy ti kinuna iti interview ti Bombo Radyo La Union kenni Ensign French Alayon, spokesperson ti Coast Guard Northwestern Luzon, kas paset ti agtultuloy a relief operations ti gobyerno ken panangtulong kadagiti agkasapolan unay nga umili.
Pakaibilangan ditoy ti 270 family food packs, hygiene kits, kinarton a mineral water, clothings, ken dadduma pay a goods.
Kinuna ni Alayon nga iti immuna a batch ti relief goods ket nai-deliver idi Nobyembre 20 bayat nga iti 2nd batch ket simmangpet idiay Isabela-LGU idi kalman.
Kinuna na a namnamaen pay iti 3rd batch ti tulong a maipaay para kadagiti biktima ti kalamidad agsipudta agtultuloy iti panagawat ti istasyon da a nakabase iti Barangay Poro, San Fernando City, La Union iti donasyon manipud kadagiti umili.
Kabayatanna, agtultuloy met ti panagtulong iti Bombo Radyo Phils Foundation, Inc. kadagiti nadidigra ti bagyo idiay Cagayan ken Isabela.
Para kadagiti agtarigagay a tumulong kadagiti agkasapolan, maiparbeng laeng nga ited ti donasyon para iti Tulong ti Kabsat ti Bombo Radyo Phils. Foundation , Inc. iti BDO ILOILO Iznart Branch Current Account No. 004168002903
Para met kadagiti foreign donors, mabalin nga idalan iti BDO US Dollar Account No. 4160084160
Iti Tulong ti Kabsat ket maysa nga special social responsibility project ti Bombo Radyo Phils. iti Number 1 Radio Network in the Country…Basta Radyo Bombo!
