LA UNION – Natay iti pannakalmes iti maysa a rescuer a kameng ti Philippine Coast Guard iti kangitingitan ti Search and Retrieval Operation dagitoy idiay Sitio Daeng, Barangay Halog East, Tubao, La Union, idi bigat kalman, Setyembre 5, 2023.
Nabigbig iti biktima a ni Petty Officer Third Class (PO3) Ponciano dela cruz Nisperos, maysa a miyembro ti Phil. Coast Guard Special Operations Group-North Western Luzon (SOG-NWLZN) a nakabase ditoy siyudad ti San Fernando, La Union.
Iti interview ti Bombo Radyo La Union kenni Ensign Nisperos, kinuna na a nagresponde da Nisperos iti report nga adda iti menor de edad a nalmes iti karayan idiay ili ti Tubao.
Ngem kabayatan iti panangi-wayat ni Nisperos iti tali nga agserbi koma a lif-line dagiti rescuers iti bangir a paset ti karayan, ket maipagarop a napukawan ti balanse iti katengngaan ti napegges a danum ti karayan, a nakaigapwan ti pannakalmes daytoy.
Pinadas dagiti kakadwa na nga isalbar daytoy ken dagus a naiturong iti ospital idiay Agoo, La Union ngem naideklara a dead-on-arrival.
Kabayatanna, ituloy ti rescue team a buklen dagiti kameng ti Phil. Coast Guard, PDRRMO, ken Tubao Police, a sapolen iti ubing a nalmes iti karayan.
Nabigbig daytoy a ni Edward Saltat Damaso, 12-anyos, maysa a Grade 5 student ken residente iti nadakamat a lugar.
Segun kenni Rillion, temporaryo a naisardeng iti search and retrieval operation idi kalman gaputi saan a nasayaat a kasasaad ti panawen.
Maipalagip a ni Damaso iti mapan koma i-rescue dagiti otoridad kalpasan a nalmes iti karayan idi malem ti Lunes, Setyembre 4, 2023.
Ni Damaso ken dagiti padana nga agtutubo iti nasao a lugar ket napan da nagdidigos iti karayan iti laksid ti saan pay a nasayaat a panawen gapwanan ti panagraira ti Southwest Monsoon wenno Habagat .
