Naisalang ti House prosecution panel ni Colonel Manaros Boransing II kas baro a saksi iti maika-20 nga aldaw ti impeachment trial ni Bise Presidente Sara Duterte iti Senate Impeachment Court ita a Martes, Setiembre 1, mainaig iti alegasion ti biddut a pannakausar ken saan nga umno a liquidation ti confidential funds ti Department of Education (DepEd).
Naipamaysa ti hearing iti Article I ti Articles of Impeachment, partikular iti panangusar ti DepEd iti ₱112.5 million confidential funds idi 2023, idi sekretario pay laeng ni Duterte iti ahensia.
Manamnama a lawlawagan ni Boransing dagiti military certifications nga insubmitir ti DepEd iti Commission on Audit kas paset ti panangilawlawag iti pannakausar ti confidential funds. Karaman ditoy dagiti dokumento a mainaig kadagiti aktibidad ti militar kas iti Youth Leadership Summit (YLS).
Segun iti prosekusion, napateg iti testimonia ni Boransing tapno maammuan no nakaawat ti Armed Forces of the Philippines iti pinansial a tulong wenno reward manipud iti DepEd gapu iti kastoy nga aktibidad. Iti immun-una nga hearing iti Kamara, imbaga dagiti sumagmamano nga opisial ti militar a saan a nakaawat dagiti yunitda iti kompidensial a pondo manipud iti DepEd.
Indauluan ni Senador-judge Juan Miguel “Migz” Zubiri ti kararag sakbay a nangrugi ti hearing, no sadino a kiniddawna nga iti panagusig ket saan a pakaigapuan ti panagsisina dagiti Pilipino ken agserbi ketdi a dalan nga agturong iti panagkaykaysa ken napudno a panagturay.
Agarup 15 a senador-judges ti timmabuno iti panangrugi ti hearing. Kabayatanna, ni Atty. Ni Rey Robles iti nangimaton iti panangitukon ti prosekusion iti ebidensia mainaig iti opisial a statement ni Boransing.
Karaman met a nakatuding a tumestigo ita nga aldaw ni Col. Magtangol Panopio, nga agpada a manamnama a mangipaay ti palawag kadagiti military certification nga inusar ti DepEd iti panagsungbat kadagiti obserbasion ti COA.###
