LA UNION – Impaganeteget ti liderato iti La Union Police Provincial Office (LUPPO) nga awan iti pabpaboran ti pulisya maipapan iti report a maaw-awatda manipud kadagiti agkalaban iti politika nga adda ti kinadamsak a mapaspasamak idiay ili ti Balaoan, La Union iti kangitingitan ti campaign period.
Iti pannakiuman ti Bombo Radyo kenni Col. Ricardo Layug Jr., director ti LUPPO, kinunana nabuyanan iti social media ti news presentation iti maysa a radio station a nakabase idiay National Capital Region maipapan ti susik iti baetan dagiti agkalaban ti politika nga isuda incumbent Municipal Mayor Aleli Concepcion ken Retired General Pedro Obaldo Jr. iti Balaoan.
Sigun kenni Col. Layug, makurangan isuna iti nairuar a report gapu ta saan a naala iti benneg ti election officer ti ili.
Nasken met kinunana, a nagturong ti nagkalap iti damag iti “center of gravity” wenno ammuen iti makuna dagiti tattao iti lugar tapno maammuan dagiti dadduma pay a pasamak.
Dagiti met laeng naagrabyado a partido ti kinunana a naiparang iti damag ken awan met iti makuna a third party wenno tattao nga adda iti lugar ti insidente a saan a kunektado iti politika ti nagsarita.
Inkallintegan met ni Col. Layug dagiti kameng iti Balaoan Police a maak-akussaran a ‘bias’ ken pabpaburanda ti retirado a police general.
Impaganetget iti direktor ti LUPPO nga agtaltalinaed a ‘neutral’ dagitoy ken amin a reklamo nga iyum-uman iti agkalaban ti politika ket tamtamingenda.
Imbatad pay ni Col. Layug, no makitana wenno ti mismo nga election officer iti ili ti mangibaga nga adda ti pabpaboran iti hepe ti Balaoan Police a nio Capt. Juanito Buaron Jr. ket insigida nga ikkatenna daytoy ti pwesto ken idataganna pay ti kaso.
Dinepensaan met ni Col. Layug iti nagbalin nga statement ni Capt. Buaron iti interview a saan a basta makaited iti konklusyon ti pulisya maipapan iti mapaspasamak a kinadamsak kas iti pammaltog iti maysa a balay ti kabagyan ken suppoters ni Mayor Concepcion idi napalabas a lawas.
Inlawlawag iti mangidadaulo ti LUPPO, a mabayag iti panaggunay iti imbestigasyon no saan a makitinnulong iti pulisya dagiti agrekreklamo kas laengen iti saan a panangipaay kadakuada ti kopya iti CCTV footage iti riding in tandem a nangpaltog iti nasao a balay.
Kabayatanna, awan met iti parikot sigun kenni Col. Layug no immasidegen iti National Bureau of Investigation iti kampo dagiti Concepcion gapu ta dakkel a makatulong daytoy tapno maresolba ti kaso.
