Inadmitir ti Commission on Elections (Comelec) a kasapulan ti kanayonan a pondo no maitantan ti Barangay ken Sangguniang Kabataan Elections (BSKE) a naituding inton Nobiembre 2.
Rimmuar daytoy a saritaan kalpasan ti singasing nga itantan pay laeng iti eleksion gapu iti epekto ti krisis idiay Middle East.
Segun kenni Comelec Chairman George Erwin Garcia, nupay addan iti 85 a porsiento ti kinasaganada, sumurotda latta no ikeddeng ti Kongreso nga itantan ti eleksion.
Nupay kasta, impaganetgetna a kasapulan a dumawatda manen ti kanayonan a pondo tapno masupusupan dagiti gastos kas iti kabaruan a voter registration, pangnayon kadagiti presinto, panaggatang kadagiti alikamen ken balota, ken panagbayad kadagiti mannursuro nga agserbi kas election workers.
Mapattapatta a dumanon ti agingga tallo billion a pisos iti kasapulan no maaddaan ti BSKE reset.###
